Job 7

1 “Umuntu kakho emtshikatshikeni onzima yini emhlabeni? Izinsuku zakhe kazifani yini lezomuntu oqatshiweyo na?

2 Njengesigqili siloyisa amathunzi okuhlwa, lanjengoqatshiweyo elindele kabi umholo wakhe,

3 kanjalo ngibekelwe izinyanga ezingelambuyiselo, lobusuku bosizi sebabelwe mina.

4 Ngithi nxa ngilala ngicabange ngithi, ‘Kuzakusa nini na’? Ubusuku buyadonsa ngiqwayize kuze kuse.

5 Umzimba wami uphihlika impethu lamathuthuva, isikhumba sami siyobukile siyabhibhidla.

6 “Izinsuku zami ziyaphangisa kulesalukiso somaluki, zisuka ziphele kungekho ithemba.

7 Khumbula, hawu Nkulunkulu, ukuthi impilo yami ngumoya nje; amehlo ami kawayikufa akubona njalo ukuthokoza.

8 Ilihlo elingibonayo khathesi alisayikuphinde lingibone futhi; lizangidinga, kodwa ngizakuba ngingasekho.

9 Njengeyezi elinyamalalayo liphele, kanjalo lowo ongena engcwabeni kaphenduki.

10 Kasoze lanini aphinde angene endlini yakhe; indawo yakhe kayisayikubuye imazi lanini.

11 “Ngakho-ke kangizukuthula; ngizakhuluma ubuhlungu obusemoyeni wami, ngizasola ngokudabuka komphefumulo wami.

12 Ngilulwandle yini, kumbe ngiyisilo semanzini okungaze lihlale lingilindile?

13 Ngithi lapho ngicabanga ukuthi umbheda wami uzangiduduza lecansi lami liphungule ukusola kwami,

14 lakhona lapho liyangethusa ngamaphupho njalo lingesabise ngemibono,

15 okwenza ngiqome ukuklinywa lokufa, kulalo umzimba wami.

16 Ngiyayeyisa impilo yami; kangiloyisi ukuphila okwaphakade. Ngiyekelani; izinsuku zami kazisatsho lutho.

17 “Umuntu uyini ungaze uzihluphe kangaka ngaye, ungaze umnake kangaka,

18 uze umhlole ekuseni izinsuku zonke njalo umlinge imizuzwana yonke na?

19 Kawusoze uke ukhangele eceleni kwami na, loba uke ungixekele okomzuzwana yini?

20 Aluba ngenze isono, kuyini engikwenzileyo kuwe, wena mlindi wabantu? Kungani ukhethe ukuhlukuluza mina na? Sengingumthwalo kuwe na?

21 Kungani ungaxoleli iziphambeko zami na, uthethelele izono zami? ngokuba kakusekhatshana ukuthi ngilale othulini; uzangidinga, kanti ngizabe ngingasekho.”